मुगुको छायाँनाथमा माछा मार्ने क्रममा करेन्ट लागेर एक युवकको ज्यान गयो

मुगु । मुगुको छायाँनाथमा करेन्ट लगाएर खोलामा माछा मार्ने क्रममा एक युवकको ज्यान गएको छ । मुगुको छायाँनाथ रारा नगरपालिका–१ र ४ मा पर्ने घट्टे खोलामा माछा मार्ने क्रममा करेन्ट लागेर भामवाडा घर भएका २२ वर्षीय सञ्जय भामको ज्यान गएको हो ।

करेन्ट लागेर बेहोस भएका भामलाई हिजो दिउँसो २ बजेतिर उपचारका लागि जिल्ला अस्पताल मुगु लगिएको थियो । उनको आज बिहान उपचारका क्रममा ज्यान गएको जिल्ला प्रहरी कार्यालय मुगुका प्रहरी नायब उपरीक्षक महेश बस्नेतले जानकारी दिनुभयो । माछा मार्न प्रयोग गरिएका ब्याट्री र इन्भर्टर प्रहरीले नियन्त्रणमा लिइसकेको उहाँले बताउनु भयो ।