मोरङ प्रहरीद्वारा अवैध सामान बरामद

मोरङ । मोरङ प्रहरीले भन्सार छली चोरी पैठारी गरेको सामान आज बरामद गरेको छ । जिल्ला प्रहरी कार्यालयबाट प्राप्त जानकारीअनुसार सो सामान करिब रु ३३ लाख ४१ हजार ९०० मूल्य बराबरको रहेको प्रहरी प्रवक्ता मानबहादुर राईले जानकारी दिनुभयो । उहाँका अनुसार बरामद गरिएको सामानमा सर्ट तीन हजार २८३ थान, जम्फर २३ थान र पाइन्ट ३५ थान रहेको पाइएको छ ।

सामान विराटनगर महानगरपालिका–७ जलजला चोक नजिक तरुणकुमार साहको गोदामबाट फेला परेको प्रवक्ता राईले बताउनुभयो । प्रहरीले सो सामान नियन्त्रणमा लिई आजै एकीकृत भन्सार जाँच चौकी विराटनगरमा बुझाएको छ । रासस