संसद् भवन र अमेरिकी दूतावास क्षेत्रमा सुरक्षाकर्मी तैनाथ

काठमाण्डौं । सम्भावित घेराउलाई मध्यनजर गर्दै आज संसद् भवन नयाँ बानेश्वर र अमेरिकी दूतावास क्षेत्रमा सुरक्षा व्यवस्था कडा पारिएको छ । एमसीसीको विरोधमा उक्त क्षेत्रमा दिनहुँ विरोध प्रदर्शन भइरहेका छन् । संसद् भवन आसपास सुरक्षा सतर्कता बढाइएको प्रहरीले जनाएको छ ।

संसद् बैठकमा एमसीसी टेबल भएको दिन देखि प्रदर्शनकारी र प्रहरीबीच झडप भइरहेको छ । आज दिउँसो १ बजे बस्ने संसद् बैठकमा एमसीसीमाथि छलफल गर्ने कार्यसूची छ । सुरक्षाका लागि संसद् भवनको मूल सडकसँगै रहेको पर्खालमा काँडेतार लगाइएको छ ।

प्रदर्शनकारी र प्रहरीबीच हुन सक्ने सम्भावित झडपलाई ध्यान दिएर पर्खाललाई तारले घेरिएको हो । यसैबीच, महानगरीय ट्राफिक प्रहरी महाशाखाले बिहान ११ बजेपछिको समयमा माइतीघर मण्डला–नयाँ बानेश्वर हुँदै यात्रा गर्दा सडकको अवस्थाबारे जानकारी राख्न आग्रह गरेको छ ।