सत्ता गठबन्धनको बैठक आज पनि बस्दै,

काठमाडौं । सत्ता गठबन्धनको बैठक आज पनि बस्दैछ । बैठक प्रधानमन्त्री निवास बालुवाटारमा बस्न लागेको हो ।

बैठकले आगामी प्रतिनिधिसभा र प्रदेशसभाको लागि सहमति नजुटेका निर्वाचन क्षेत्रको टुंगो लगाउने सम्भावना छ ।

सत्ता गठबन्धनभित्र दलहरूले दोहोरो दाबी गरेपछि केही ठाउँको सिट बाँडफाँटको टुंगो लाग्न सकेको छैन ।

छलफलले केही सिटबाहेक सबै क्षेत्रमा सहमति टुङ्ग्याएको थियो । सहमति अनुसार हालसम्म नेपाली कांग्रेसले ८३ सिट, नेकपा माओवादी केन्द्रले ३६ सिट, नेकपा एकीकृत समाजवादीले १४ सिट, जनता समाजवादी पार्टीले १३ सिट र राष्ट्रिय जनमोर्चाले दुई सिट पाउने सहमति भएको गठबन्धन बताएको छ ।

सत्ता घटक नेकपा माओवादी केन्द्रका अध्यक्ष पुष्पकमल दाहाल प्रचण्डको सचिवालयले पनि आसन्न निर्वाचनका लागि निर्वाचन क्षेत्रको बाँडफाँट टुङ्ग्याएको बताए ।

लामो समय देखिको बैठक र गृहकार्यपछि निर्वाचन क्षेत्रको टुंगो लगाएको प्रचण्डको सचिवालयले बताएको हो ।

केही निर्वाचन क्षेत्रमा भएको दोहोरो दाबेदारी शीर्ष नेतृत्वबीचको आपसी समझदारीमा छिट्टै टुंगो लगाइने प्रचण्डका स्वकीय सचिव रमेश मल्लले बताए ।