- २१ कार्तिक २०८३, शनिबार / Nov 7, 2026
सिन्धुपाल्चोक । २०७२ साल वैशाखको भूकम्पले ध्वस्त भएका सिन्धुपाल्चोकका अधिकांश विद्यालयहरु सरकार र दातृ निकायको आर्थिक सहयोगमा सुविधा सम्पन्न विद्यालय भवन पुनर्निर्माण भएका छन् ।
शिक्षा विकास तथा समन्वय एकाइका प्रमुख कृष्ण सुवेदीले भूकम्पबाट क्षति पुगेकामध्ये चारवटा विद्यालयका भवनबाहेक सबै विद्यालयका भवन पुनर्निर्माण भइसकेको बताए । उनका अनुसार ०७२ को भकम्पले सिन्धुपाल्चोकका ५४७ विद्यालय भवन ध्वस्त बनाएको थियो । पूर्ण रूपमा क्षति भएका विद्यालयका करिब तीन हजार ६२० कक्षाकोठा ढलेको जानकारी दिए ।
थाङ्पाल भ्याली माध्यमिक विद्यालय व्यवस्थापन समितिका अध्यक्ष सुन्दर सापकोटाले एसियाली विकास बैङ्कको २४ करोड रुपियाँको सहयोगमा पाँचपोखरी थाङ्पाल गाउँपालिकामा २६ रोपनी क्षेत्रफल जग्गामा विद्यालयको ५६ कोठे भवन निर्माण भएको बताए ।
त्यसैगरी प्रधानाध्यापक सानुकाजी अधिकारीले रक्तकाली आधारभूत विद्यालय सुनकोसी गाउँपालिका–१, ठोकर्पामा चाइल्ड फन्ड जापान र टुकी सङ्घ सुनकोसीको दुई करोड ३४ लाख रुपियाँको सहयोगमा निर्माण भएको जानकारी दिए ।
शिक्षा विकास तथा समन्वय एकाइका प्रमुख कृष्ण सुवेदीले भूकम्पले क्षति पुगेका विद्यालयको भूकम्प प्रतिरोधी र आकर्षक भवन निर्माणपछि विद्यार्थीमा उत्साह थपिएको बताए ।
यता, स्थानीय ज्ञानेन्द्रप्रसाद तिमल्सिनाले टाटा ट्रस्ट र सिप्रदीयन सहायता संस्थाले तीन करोड ९७ लाख रुपियाँको आर्थिक सहयोगमा बलेफी गाउँपालिका–६ को कुपकन्या माविको भवन निर्माण गरिदिएको जानकारी दिए ।
