- ७ आश्विन २०८३, बुधबार / Sep 23, 2026
काठमाण्डौ । लाजिम्पाटको आकाश फुड्स पसललाई एक लाख ५० हजार रुपैयाँ जरिबाना तिरेको छ । काठमाण्डौ महानगरपालिकाले अखाद्य सामग्री बिक्री वितरण गरेको भन्दै पसल सञ्चालक अङ्कुर अग्रवाललाई जरिवाना तिराएको हो । महानगरपालिकाले उक्त पसल सञ्चालकलाई सात दिनभित्र एनआईसी एसिया बैङ्कमा बजार अनुगमन समितिको राजस्व खाता नम्बरमा जरिबानाबापतको रकम जम्मा गरी बैङ्क भौचरको दोस्रो प्रति महानगरपालिकामा पेस गर्न पनि निर्देशन दिइएको जनाएको छ ।
सञ्चालकले सडेगलेका ढुसी परेको मिठाइ तथा किरा परेको अन्य खाद्य सामग्री बिक्री गरेको पाएपछि एक लाख ५० हजार रुपैयाँ जरिबाना गरेको महानगरले जनाएको छ ।
तोकिएको समयभित्र जरिबाना बापतको रकम नबुझाए थप कारबाही हुने महानगरपालिकाले चेतावनी समेत दिएको छ ।
कामपाले आफ्नो अधिकार क्षेत्रभित्रमा ठाउँमा जथाभाबी फोहर फाल्ने, खुल्ला ठाउँमा आगो बाल्ने, सडकमा निर्माण सामग्री राख्ने र ढल वा नदीमा फोहर मिसाउनेलाई नियमित अनुगमन गरी कारबाही गर्न थालेको छ ।
यतिमात्रै होइन महानगरपालिकाको वडा नं ६ बौद्धका गोकुलबहादुर बुढाथोकीलाई पनि ५० हजार रुपैयाँ जरिबाना तिराइएको छ । सेफ्टी ट्याङ्कीको फोहर ढलमा मिसाएको पाइएपछि बुढाथोकीलाई जरिबाना तिराइए महानगरले जनाएको छ ।
