अबदेखि फोहर बोक्ने गाडीलाई टाइमकार्ड

काठमाण्डौ । काठमाण्डौ उपत्यका ट्राफिक प्रहरी कार्यालय र काठमाण्डौ महानगरपालिकाले फोहोर बोक्ने गाडीलाई टाइमकार्ड लगाएको छ । काठमाण्डौको मुडुखु नाकाबाट तीनपिप्ले हुँदै ओखरपौवा चल्ने फोहर बोक्ने गाडीलाई शनिवारदेखि उपत्यका ट्राफिक प्रहरी कार्यालय र काठमाण्डौ महानगरपालिकाको संयुक्त पहलमा टाइमकार्ड लागू गरिएको हो ।

मुडुखुदेखि तीनपिप्लेसम्मको सडक खण्डमा प्रतिघण्टा ३० किलोमिटर र तीन पिप्लेदेखि ओखरपौवा चेकपोष्टसम्मको सडक खण्डमा प्रतिघण्टा २० किलोमिटर गति समेत निर्धारण गरिएको छ । तोकिएको ठाउँमा निर्धारित समयभन्दा छिटो पुगेमा कारबाही गरिने काठमाण्डौ उपत्यका ट्राफिक प्रहरी कार्यालयले जनाएको छ ।

दुर्घटनाको जोखिम हुने गरी तीव्रगतिमा गाडी चलाउने गरेको र असुरक्षित महसुस भएको गुनासो स्थानीयबाट आएपछि टाइमनकार्ड लागू गरिएको र मुडुखु नाकामा चालकलाई टाइमकार्ड दिइने र पालना भए–नभएको जाँच तीनपिप्ले र ओखरपौवा चेकपोष्टले गर्ने जनाइएको छ ।