- ३१ जेष्ठ २०८३, आईतवार / Jun 14, 2026
दोलखा । गौरीशंकर बालगृहको व्यवस्थापनमा समस्या देखिएको छ । अभिभावकविहीन भएका बालबालिकालाई आश्रय दिन बनेको उक्त बालगृहका बालबालिकालाई उचित स्याहारसुसार र पालनपोषण गर्न समस्या भएको हो ।
भीमेश्वर नगरपालिका–५ मा रहेको बालगृह करिव ७७ रोपनी जग्गामा छ। ४ वटा भवनहरू जीर्ण छन् । चिसो भुइँमा रात काट्न बाध्य बालकहरू सरोकारवाला निकायका कारण बेखबर जस्तै भएका छन् ।
न्यानो कपडा, ओड्ने ओछ्याउनेलगायत सामग्री उपलब्ध गराउन सरकारले पनि कुनै चासो देखाएको छैन । २०५३ सालमा नेपाल बाल संगठनले सञ्चालन गर्ने सहमति अनुसार आधुनिक भवनहरूसहित गौरीशंकर बालगृहको स्थापना भएको थियो ।
अहिले यसको अवस्था नाजुक छ । दोलखा, रामेछाप, हुम्ला, जुम्ला, नुवाकोटलगायतका जिल्लाका २१ जना अभिभावकविहीन बालकहरू यहाँ रहेका छन् । बाल संगठनको मातहतमा रहेको गौरीशंकर बालगृहको भवन भूकम्प गएको ८ वर्ष बितिसक्दा पनि पुनर्निर्माण हुन नसक्दा बालगृहमा बस्दै आएका बालकहरू चिरा परेको जीर्ण भवनमा जोखिम मोलेर बस्नु परेको छ ।
भीमेश्वर नगरपालिकाको सहयोगमा भवनको केही चिरालाई टाल्ने काम भएको नेपाल बाल संगठन दोलखाका सभापति रामप्रसाद सापकोटाले बताए । कार्यलय सहयोगी, भान्से र बालगृह प्रमुख गरी हाल बालगृहमा ३ जना कर्मचारी कार्यरत छन् । गत ५ महिनादेखि उनीहरूले तलब पाएका छैनन् ।
