आगलागी पीडितलाई निकै समस्या

रुकुम पूर्व : रोल्पाका आगालागी पीडितलाई निकै समस्या परेको छ । रोल्पाको त्रिवेणी गाउँपालिका–२ का आगलागी पीडितलाई बस्न, खान र पानीको समस्या भएको हो । पिराले र बर्तीबाङमा खानेपानीको अभाव भएको छ । नजिकको जंगलबाट गाउँमा पसेको डढेलोले मुल खोला सौर्य लिफ्ट खानेपानी आयोजना र प्युरी बर्तीबाङ सौर्य लिफ्ट खानेपानी आयोजनामा क्षति भएपछि खानेपानीको समस्या भएको जनाइएको छ ।

वैशाख १४ र १५ गतेको आगलागीबाट त्रिवेणी–२ पिरालगायत गाउँमा ३२ घर र १९ वटा गोठ जलेर ध्वस्त भएको र ती पीडितहरुमध्ये केही आफन्तकोमा शरण लिएर बसेको जनाइएको छ । केही भत्केकै घरमा त्रिपाल राखेर बसिरहेका प्रशासनले जनाएको छ । आगलागीबाट ६२ लाख १९ हजार रुपैयाँ बराबरको क्षति भएको भएको जिल्ला प्रशासन कार्यालयले जनाएको छ । पीडितहरुलाई प्रशासनले प्रतिपरिवारलाई १५ देखि २० हजार रुपैयाँका दरले राहत रकम वितरण गरेको छ ।