- २२ असार २०८३, सोमबार / Jul 6, 2026
काठमाडौं । शिक्षकहरू आन्दोलनको डम्फु बजाउन राजधानी छिरेपछि आजदेखि देशभरका ७० लाख भन्दा बढी विद्यार्थीहरूको पठनपाठन बन्द हुने भएको छ। सरकारले ल्याएको विद्यालय शिक्षा विधेयकमाथि आपत्ति जनाउँदै शिक्षकहरू सडक आन्दोलनमा होमिएका छन् ।
देशभरबाट शिक्षकहरु काठमाडौँ आएसँगै विद्यार्थीहरूको पठनपाठन प्रभावित भएको हो । नेपाल शिक्षक महासंघको नेतृत्वमा शिक्षक, कर्मचारी आन्दोलनमा छन् । हिजो संविधान दिवसको अवसरमा सरकारले सार्वजनिक बिदा दिएको थियो ।
आज शिक्षकहरुले अनिश्चितकाल सम्मका लागि देशभरका सामुदायिक विद्यालय बन्द गर्न लागेका हुन् । शिक्षक कर्मचारी आन्दोलनमा आएकोले सम्पूर्ण विद्यालयको पठनपाठन अवरुद्ध हुने नेपाल शिक्षक महासंघका महासचिव लक्ष्मीकिशोर सुवेदीले बताए ।
आन्दोलनका कारण रोकिएको पढाइ पछि सार्वजनिक बिदामा पढाउने गरि व्यवस्था मिलाइएको उनको भनाइ छ । सरकारकै कारण आफुहरु आन्दोलनमा आउनुपरेको भन्दै विद्यार्थीहरूको पढाईमा कुनै समस्या नपार्ने शिक्षकहरु बताउँछन् ।
आन्दोलनको पहिलो दिन ७० हजारको हाराहारीमा शिक्षकहरु प्रदर्शनमा उत्रिएका थिए ।
