- ३१ आश्विन २०८३, शनिबार / Oct 17, 2026
काठमाडौं । आफ्ना माग पूरा नभएसम्म आन्दोलन नरोकिने व्यवसायी दुर्गा प्रसाईंले बताएका छन् । बिहीबार बल्खुमा प्रदर्शन गरे लगतै पत्रकार सम्मेलन गर्दै आन्दोलन जारी रहने बताएका हुन । शुक्रबार बिहान ११ बजे तीनकुनेमा जम्मा भएर प्रदर्शन गर्ने भन्दै प्रसाईंले देशको अहिलेको परिस्थितिबाट पीडित सबै प्रदर्शनमा आउनु पर्ने बताए । उनले काठमाडौंका पसलेहरुले पसल बन्द गर्दै सहयोग गर्ने तर्क समेत गरे ।
प्रसाईंले आफूहरुको आन्दोलन केवल आन्दोलन मात्रै नभएर जनविद्रोह भएको दाबी गर्दै प्रदर्शनका क्रममा बल्खुमा भएको झडपमा आफ्नो पक्षका २६ जना घाइते भएको र एक जनालाई टाउकोमा गोली लागेको दाबी समेत गरे । उनले घाइते सबैको उपचार आफै गर्ने समेत जानकारी दिए ।
यस अघि काठमाडौँको बल्खुमा दुर्गा प्रसाईं नेतृत्वको समूहले गरेको प्रदर्शन क्षेत्रमा भएको झडपमा पाँच प्रहरीसहित २८ जना घाइते भएका थिए । झडपपछि स्थिति नियन्त्रणमा लिने क्रममा पाँच प्रहरी र २३ जना प्रदर्शनकारी घाइते भएका काठमाडौँ उपत्यका प्रहरी कार्यालयले जनाएको छ।
