- १० कार्तिक २०८३, मंगलवार / Oct 27, 2026
काठमाडौं । नेपाल उद्योग वाणिज्य महासंघको ५७ औं वार्षिक साधारण सभा काठमाडौंमा सुरु भएको छ । साधारणसभाले महासंघको नयाँ नेतृत्व चयन गर्ने बताइउको छ । साधारणसभाबाट वरिष्ठ उपाध्यक्ष चन्द्र ढकाल स्वतः अध्यक्ष हुने भएपछि नयाँ वरिष्ठ उपाध्यक्ष लगायतका पदका लागि बुधबार निर्वाचन हुदैछ ।
उद्योगी व्यवसायीहरुको छाता संस्था उद्योग वाणिज्य महासंघको विधानमा वरिष्ठ उपाध्यक्ष चुनिएको व्यक्ति तीन वर्षे कार्यकाल पछि स्वतः अध्यक्ष बन्ने व्यवस्था गरिएको छ ।नयाँ वरिष्ठ उपाध्यक्षका लागि अन्जन श्रेष्ठ, रामचन्द्र सांघाई र उमेशलाल श्रेष्ठ चुनावी प्रतिस्पर्धामा होमिएका छन् ।
प्यानलसहित उम्मेदवारी घोषणा गर्दै उनीहरुले उद्योग व्यापारमैत्री वातावरण निर्माणका लागि सरकारसँग पहल गर्ने एजेण्डा अघि सारेका छन् । साधारण सभाले महासंघको ६४ सदस्यीय नयाँ कार्यसमिति चयन गर्ने छ ।
लुम्बिनी प्रदेश सदस्यमा जमशेर मियाँ र नेपाल–भारत उद्योग वाणिज्य संघका प्रतिनिधि राष्ट्रिय सदस्यका उम्मेदवार सुनील केसी भने यसअघि नै निर्विरोध भएका छन् । जिल्ला नगरतर्फबाट चुनिने एक उपाध्यक्ष पदमा दिनेश श्रेष्ठ, अरुणराज सुमार्गी र सुरजकृष्ण वैद्य प्रतिस्पर्धामा छन् ।
त्यस्तै वस्तुगत उपाध्यक्षमा हेमराज ढकाल, मनीषलाल प्रधान र शकुन्तलाल हिराचन तथा एसोसिएटतर्फको उपाध्यक्ष पदमा भरतराज आचार्य र ज्योत्सना श्रेष्ठ प्रतिस्पर्धामा छन् ।
