उपराष्ट्रपतिको चुनाव आज, १० देखि दिउँसो ३ बजेसम्म मतदान

काठमाडौं । उपराष्ट्रपतिको चुनाव आज हुदैछ । बिहान १० देखि दिउँसो ३ बजेसम्म मतदानको समय तोकिएको निर्वाचन आयोगले जनाएको छ । त्यसका लागि सम्पूर्ण तयारी पूरा भएको प्रेस विज्ञप्तिमार्फत जनाएको छ ।

स्वविवेक प्रयोग गरी मतदान गर्न निर्वाचक मण्डलका सदस्यहरूलाई आयोगले अनुरोध गरेको छ । एमालेकी अष्टलक्ष्मी शाक्य, जसपाका रामसहाय प्रसाद यादव र जनमतकी ममता झा चुनावी मैदानमा छन् । सत्तारुढ गठबन्धनबाटै तीन जनाको उम्मेदवारी परेकामा जसपाकी प्रमिलाकुमारी यादव पछि हटेकी थिइन् ।

निर्वाचन आयोगका अनुसार बिहान १० देखि दिउँसो ३ बजेसम्म मतदानको समय तोकिएको छ। यो निर्वाचनमा संघीय संसद्का सदस्य र प्रदेशसभाका सदस्य मतदाता रहेको निर्वाचक मण्डल रहने व्यवस्था राष्ट्रपति तथा उपराष्ट्रपतिको निर्वाचनसम्बन्धी ऐन, २०७४ ले गरेको छ। संघीय सांसदको मतभार ७९ र प्रदेशसभा सदस्यको ४८ गणना हुन्छ।