- २८ जेष्ठ २०८३, बिहीबार / Jun 11, 2026
काठमाडौं । सरकारको सिफारिसमा राष्ट्रपति विद्यादेवी भण्डारीले २५ पुसको दिउँसो १ बजे प्रतिनिधिसभाको अधिवेशन आह्वान गरेकी छन् । सोही अनुरुप २५ पुसमा प्रतिनिधिसभाको बैठक बोलाइएको छ । प्रतिनिधिसभाको अधिवेशन आह्वान भएसँगै सभामुखका लागि दौडधुप चलेको छ ।
संविधान अनुसार माघ १० गतेभित्रै संसदले सभामुख पाउने देखिएको छ । प्रतिनिधिसभाको पहिलो बैठक बसेको १५ दिनभित्र सभामुख र उपसभामुखको निर्वाचन गर्नुपर्ने संवैधानिक व्यवस्था छ ।
संविधानको धारा ९१ मा भनिएको छ, ‘प्रतिनिधि सभाको पहिलो बैठक प्रारम्भ भएको मितिले पन्ध्र दिनभित्र प्रतिनिधि सभाका सदस्यहरूले आफूमध्येबाट प्रतिनिधि सभाको सभामुख र उपसभामुखको निर्वाचन गर्नेछन् ।’ सभामुखको टुंगो नलागेसम्म प्रतिनिधिसभाका जेष्ठ सदस्य पशुपति शमशेर जबराले प्रतिनिधिसभा बैठकको अध्यक्षता गर्नेछन् ।
सत्ता गठबन्धनभित्र सभामुख पद नेकपा एमाले र माओवादी केन्द्रले आधा÷आधा कार्यकाल लिने सहमति भएको छ । सहमति अनुसार प्रधानमन्त्रीमा पनि आलोपालो गर्दा सुरुमा माओवादीले प्रधानमन्त्री लिएका कारण सुरुको सभामुख पद एमालेले लिने बताइएको छ । एमालेमा सभामुखकालागि धेरै सांसदहरु लविङ्ग गरिरहेका छन् ।
संसदीय दलको नेता केपी शर्मा ओलीले सभामुखबारे मुख खोलिनसकेकाले यही हुन्छ भन्ने कुरा गर्भमै भएपनि छविलाल विश्वकर्मा, सुब्बा गुरुङ र विद्या भट्टराई कुरिरहेको स्रोतको दावी छ । सभामुखमा महिला पठाउँदा विद्या भट्टराई पहिलो नम्बरमा जाने वताइएको छ ।
