- २७ श्रावण २०८३, बुधबार / Aug 12, 2026
काठमाडौं । काँग्रेसको १४ औँ महाधिवेशन अन्तर्गत आज ६० जिल्लामा प्रतिनिधि सभा निर्वाचन क्षेत्रको अधिवेशन सुरु हुँदैछ । १४८ वटा प्रतिनिधि सभा निर्वाचन क्षेत्रमा अधिवेशन सोमबार सुरु हुन लागेको नेपाली काँग्रेस केन्द्रीय निर्वाचन समितिले जनाएको छ ।
१४ वटा जिल्लाका अधिवेशन सम्पन्न भइसकेका छन् भने आज ६० जिल्लामा अधिवेशन हुन लागेको केन्द्रीय निर्वाचन समितिका संयोजक महादेव यादवले बताए ।
उनले भने, ‘बाँकी रहेका १४८ वटा प्रतिनिधि सभा निर्वाचन क्षेत्रमा सोमबारबाट अधिवेशन सुरु हुँदैछ ।’ सर्लाही, सिन्धुपाल्चोक र रसुवाका अधिवेशन विवादका रोकिएको र विवाद समाधानका लागि महामन्त्री डा. शशांक कोइराला र सहमहामन्त्री डा. प्रकाशशरण महतबीच छलफल भएको उनको भनाइ छ ।
नेपाली काँग्रेसले आज प्रतिनिधिसभा क्षेत्रीय र एक निर्वाचन क्षेत्र भएको जिल्ला अधिवेशन हुने जनाएको छ । मंसिर १० गते एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन हुने छ । केन्द्रीय महाधिवेशनका मतदाता महाधिवेशन प्रतिनिधि पनि चयन गरिने यादवले जानकारी दिए ।
वडा अधिवेशनबाट चुनिएका क्षेत्रीय प्रतिनिधिले प्रतिनिधि सभा निर्वाचन क्षेत्रको नेतृत्व र महाधिवेशन प्रतिनिधि चयनका लागि मतदान गर्ने बताइएको छ । आज महाधिवेशन प्रतिनिधि चयन हुने भएकाले अधिकांश केन्द्रीय नेताहरु आआफ्नो गृह जिल्लामा खटिएका छन् ।
