- २२ कार्तिक २०८३, आईतवार / Nov 8, 2026
हेलम्बुका किसानले झण्डै ३०० किलो सयपत्री फूल काठमाडौँ ल्याएका छन् ।
कृषि एम्बुलेन्समार्फत फूल तथा मौसमी कृषि उपज राजधानी पुर्याइएको हो ।
मखमली, एभोकाडो, जुनार र हलुवावेदसमेत बिक्रीका लागि ल्याइएको छ ।
ढुवानी लागत घटाउने र किसानलाई उचित मूल्य दिलाउने लक्ष्य ।
स्थानीय उत्पादनको बजारीकरणमा गाउँपालिकाको पहल ।
सिन्धुपाल्चोक, २२ कार्तिक । सिन्धुपाल्चोकको हेलम्बु गाउँपालिकाका किसानले उत्पादन गरेको झण्डै ३०० किलो सयपत्री फूलसहित विभिन्न कृषि उपज काठमाडौँको बजारमा पुर्याइएको छ ।
गाउँपालिकाले स्थानीय उत्पादनको बजारीकरणका लागि सञ्चालनमा ल्याएको ‘कृषि एम्बुलेन्स’ मार्फत किसानका उत्पादन राजधानीसम्म पुर्याइएको हो । ढुवानी र बजारको उचित व्यवस्था नहुँदा यसअघि किसानले आफ्ना उत्पादन बारीमै कुहाउनुपर्ने वा न्यून मूल्यमा बेच्नुपर्ने अवस्था थियो ।
गाउँपालिकाका वरिष्ठ कृषि प्राविधिक उद्धव कार्कीका अनुसार कृषि एम्बुलेन्स सञ्चालनमा आएपछि पहिलो पटक ठूलो परिमाणमा सयपत्री, मखमली फूललगायत एभोकाडो, जुनार र हलुवावेद बिक्रीका लागि काठमाडौँ ल्याइएको हो ।
कृषि एम्बुलेन्सले ढुवानी लागत घटाउनुका साथै किसानलाई बजारसम्म सीधा पहुँच पुर्याउन सहयोग गरेको गाउँपालिकाको भनाइ छ । यसबाट बिचौलियाको प्रभाव घट्ने र किसानले आफ्नो उत्पादनको उचित मूल्य पाउने अपेक्षा गरिएको छ ।
स्थानीय उत्पादनलाई बजारसँग जोड्ने यो पहलले हेलम्बुका किसानलाई व्यावसायिक कृषितर्फ आकर्षित गर्नुका साथै तिहारका बेला फूल तथा अन्य कृषि उपजको बिक्री बढाउन सहयोग पुग्ने विश्वास गरिएको छ ।
