- २२ कार्तिक २०८३, आईतवार / Nov 8, 2026
चितवन, २२ कात्तिक । पृथ्वीराजमार्गअन्तर्गत चितवनको इच्छाकामना गाउँपालिका–४ स्थित घोप्टेभीरमा खसेको सुक्खा पहिरो पन्छाएपछि सडक दुईतर्फी सञ्चालनमा आएको छ ।
आज बिहान पहिरो खसेर अवरुद्ध भएको सडक दिउँसो २ः१५ बजेदेखि पूर्ण रूपमा सञ्चालनमा आएको हो । यसअघि दिउँसो १२ बजेदेखि सडक एकतर्फी सञ्चालन गरिएको थियो ।
जिल्ला प्रहरी कार्यालयका प्रमुख प्रहरी उपरीक्षक रामेश्वर पौडेलका अनुसार सडक दुईतर्फी सञ्चालनमा आएसँगै रोकिएका सवारीसाधन गन्तव्यतर्फ लागेका छन् । एकतर्फी सञ्चालनका क्रममा सवारीसाधनलाई लाम लगाएर आलोपालो गरी पठाइएको थियो ।
नौबिसे–मुग्लिन सडक आयोजना पश्चिम खण्डका सूचना अधिकारी इन्जिनियर सचिन्द्र मिश्रका अनुसार सडकबाट झण्डै ३५ मिटर माथिबाट सुक्खा पहिरो खसिरहेकाले सफाइमा कठिनाइ भएको थियो ।
उनका अनुसार उक्त स्थानमा भित्तो काटिएको नभए पनि माथिबाट आफैँ पहिरो खसेको हो । कमजोर भूभाग भएकाले जुनसुकै बेला पुनः पहिरो खस्न सक्ने जोखिम भने कायमै रहेको मिश्रले बताउनुभयो ।
