- २६ असार २०८३, शुक्रबार / Jul 10, 2026
काठमाडौँ, १२ माघ । काठमाडौँ उपत्यकाको वायु आज अस्वस्थकर अवस्थामा पुगेको छ। विश्वभरको वायु प्रदूषणको अवस्था ‘रियल टाइम’मा मापन गर्ने अन्तर्राष्ट्रिय संस्था आईक्यू एयर (IQAir) का अनुसार काठमाडौँ उपत्यकाको वायु गुणस्तर सूचकांक (AQI) मानव स्वास्थ्यका लागि अस्वस्थकर तहमा पुगेको हो।
आईक्यू एयरका तथ्यांकअनुसार काठमाडौँ उपत्यका अन्तर्गत भक्तपुरको वायु गुणस्तर सूचकांक १८५ एक्यूआई मापन गरिएको छ। यस्तै, काठमाडौँको कीर्तिपुर क्षेत्रमा १५४ एक्यूआई र ललितपुरको पाटन क्षेत्रमा १५० एक्यूआई मापन भएको छ। यी सबै सूचकांक जनस्वास्थ्यको दृष्टिकोणले अस्वस्थकर श्रेणीमा पर्छन्।
वायु गुणस्तर सूचकांक १५१ देखि २०० एक्यूआईसम्म पुगेमा ‘अस्वस्थकर’ मानिन्छ। सूचकांक १०० भन्दा माथि पुगेमा विशेषगरी स्वास्थ्य कमजोर भएका व्यक्ति, बालबालिका, वृद्धवृद्धा तथा दीर्घरोगीहरूका लागि जोखिमपूर्ण हुन्छ भने १५० भन्दा माथि पुगेमा सबै नागरिकका लागि अस्वस्थकर मानिन्छ।
आज बिहानको तथ्यांकअनुसार विश्वका प्रदूषित शहरहरूको सूचीमा काठमाडौँ १२औँ स्थानमा रहेको छ। विश्वकै सबैभन्दा प्रदूषित शहरको सूचीको पहिलो स्थानमा बंगलादेशको ढाका रहेको छ भने दोस्रो स्थानमा भारतको कोलकाता रहेको छ।
स्वास्थ्य विज्ञहरूले अत्यधिक प्रदूषणका बेला अनावश्यक रूपमा बाहिर ननिस्कन, मास्कको प्रयोग गर्न तथा संवेदनशील समूहलाई विशेष सावधानी अपनाउन आग्रह गरेका छन्।
