- ३१ असार २०८३, बुधबार / Jul 15, 2026
भरतपुर । मंसिर ४ मा हुने निर्वाचन नजिकै जाँदा चितवन क्षेत्र–२ को चुनावी माहोल तातेको छ । प्रतिनिधिसभा सदस्यका उम्मेदवार १६ जना चुनावी मैदानमा होमिएका छन् । तर चितवन–२ मा सत्तारुढ गठबन्धनका उम्मेदवार उमेश श्रेष्ठ, एमाले नेता कृष्णभक्त पोखरेल र राष्ट्रिय स्वतन्त्र पार्टीका सभापतिसमेत रहेका रवि लामिछानेबीच कडा प्रतिस्पर्धा हुने देखिएको छ ।
मतदातालाई आफ्नो पक्षमा पार्न घरदैलोमा दौडिरहेका उनीहरुले माहोल तताइरहेका छन् । चितवनबाट माओवादी केन्द्रका अध्यक्ष प्रचण्ड गोरखा लागेपछि सञ्चारकर्मबाट राजनीतिमा लागेका रवि लामिछाने उम्मेदवार बनेसँगै चितवन चर्चामा चुलिएको छ ।
यस्तै, प्रधानमन्त्री कार्यालयका राज्यमन्त्रीसमेत रहेका उमेश श्रेष्ठ पहिलो पटक प्रत्यक्षतर्फ चुनावी मैदानमा होमिएका छन् । उनी यसअघि समानुपातिकबाट सांसद बनिसकेका हुन् । अर्का नेकपा एमालेका उम्मेदवार कृष्णभक्त पोखरेल यो क्षेत्रका लागि नयाँ होइनन् ।
पोखरेलले २०७० र २०७४ को निर्वाचनमा यो क्षेत्रबाट जित हासिल गरेका थिए । उनले २०७४ को प्रतिनिधिसभा निर्वाचनमा कांग्रेसका शेषनाथ अधिकारीलाई १७ हजार ३५६ मतले हराएका थिए ।
