- ९ आश्विन २०८३, शुक्रबार / Sep 25, 2026
काठमाडौं । नेपाली कांग्रेसको १४औं महाधिवेशनबाट केन्द्रीय कार्यसमितिका लागि एक सय ३४ जना निर्वाचित भएका छन् । कांग्रेस विधानअनुसार केन्द्रीय समिति १६७ सदस्यीय हुन्छ । सभापति शेरबहादुर देउवाले ३३ जना केन्द्रीय सदस्य मनोनित गर्न पाउँने विधानले नै अधिकार दिएको छ ।
तर चुनाव हारेका नेतालाई केन्द्रीय सदस्य बनाउन मिल्ने कि नमिल्ने विधानमा केही उल्लेख नभएकाले देउवा अलमलमा परेका छन् । सोही कारण देउवाले गत १० पुसमा बसेको पहिलो बैठकमा केही नेतालाई केन्द्रीय सदस्य बनाउने तयारी गरे पनि सकेका छैनन् । उनले पराजित उम्मेदवारलाई मनोनित गर्न विधानले केही असर गर्छ कि गर्दैन भनेर आफू निकट कानून व्यवसायीहरुसँग सल्लाह मागेका छन् ।
देउवा निकट नेता मीन विश्वकर्मा पदाधिकारीमा चुनाव लडेका र केन्द्रीय समितिमा आवश्यक महसुस भएका नेताहरुलाई सभापतिले मनोनित गरेर ल्याउने बताएका छन् । सभापतिमा दोस्रो स्थानमा परेका डा. शेखर कोइरालालाई भने विधानले नै स्वतः केन्द्रीय सदस्य बनाउँछ ।
देउवालाई पहिलो चरणमा सभापतिमा हारेर दोस्रो चरणमा आफूलाई सघाएका प्रकाशमान सिंह, विमलेन्द्र निधीलाई केन्द्रीय सदस्य बनाउनै पर्ने बाध्यता एकातिर छ । आफ्नै टिमबाट उपसभापतिमा चुनाव हारेका विजयकुमार गच्छदार, महामन्त्रीमा हारेका डा. प्रकाशशरण महत र प्रदीप पौडेललाई पनि केन्द्रीय सदस्य बनाउन दवाव परेको छ ।
