केरा खादै हुनुहुन्छ खबरदार ! अति छ विषादी प्रयोग

चितवन । केरामा सबैभन्दा बढी विषादी भेटिएको छ । सात सय १८ तरकारी र फलफूलको नमूना परीक्षण गर्दा केरामा बढी विषादी भेटिएको कृषि ज्ञान केन्द्र चितवनको परीक्षणमा भेटिएको हो । केरापछि फर्सी र भन्टामा विषादी हालेको पाइएको कृषि ज्ञान केन्द्रका प्राविधिक सहायक सुरेश सिम्खडाले बताए ।

चालु आवको साउनमा गरिएका परीक्षणमा सबैभन्दा बढी विषादी केरामा नै भेटिएको छ । केरा पकाउनका लागि प्रयोग हुने इथालिन र क्याल्सियम कार्बोनेट अत्याधिक प्रयोग गरेको पाइएको हो । फोटो मिटरबाट गरिएको परीक्षणमा केमिकल राखेर रोकावट आउने प्रतिशत हेरेर विषादी प्रयोग गरिएको ४५ प्रतिशतभन्दा बढी इन्जाइममा रोकावट आएमा त्यो केरा नष्ट गरिन्छ ।

पैतीस प्रतिशतभन्दा बढी रोकावट आएमा त्यस्तो केरालाई क्वारेन्टिनमा राखेर केही दिनपछि मात्र प्रयोग गर्न लगाइन्छ । प्रायः गरेर केरालाई क्वारेन्टिनमा पठाउनुपर्ने अवस्था आएको प्राविधिक सहायक सिम्खडाले बताए । पैतीस प्रतिशतभन्दा कम रोकावट आएमात्र केरा खानयोग्य हुने उनको भनाइ छ ।

त्यसैले तपाईं केरा खादै हुनहुन्छ भने होसियार कतै विषादी त खाइरहनु भएको छैन भनेर कृषि ज्ञान केन्द्रले सचेत गराएको छ । अत्यधिक पोषणले भरिपूर्ण केरा बाह्रैमास पाइने फल हो । तर कहिलेकाहीँ केरा स्वास्थ्यका लागि हानिकारक सावित हुनसक्छ ।

यसमा बढी मात्रामा रसायन र विषादीको प्रयोग भएमा केरा स्वास्थ्यका लागि हानिकारक हुनसक्ने चिकित्सक बताउँछन् । धेरै परिमाणमा इथालिन र क्याल्सियम कार्बोनेटजस्ता औषधि प्रयोग गरेर पकाइएको केरा खाँदा स्वास्थ्यमा गम्भीर असर पर्ने भरतपुर अस्पतालका डा गोविन्द कँडेलले बताए ।

यस्तो केरा खाएमा पेट दुख्ने, अल्सर हुने, न्यूरो प्रणालीमा असर गरेर टाउको धेरै दुख्नेजस्ता गम्भीर असर देखिन सक्ने उनले को भनाइ छ । गर्भवतीलाई यस्तो केरा खुवाएमा पेटमा रहेको बच्चालाई समेत असर गर्ने कँडेलले बताए । विज्ञका अनुसार केरामा रसायन हालेर पकाइएको छ कि छैन भनेर चिन्न केही कुरामा ध्यान दिनुपर्छ ।

कर्बोहाइड्रेड तथा अन्य रसायन प्रयोग गरिएको छ भने गन्ध फरक हुन्छ । आकार हेरेर पनि केरामा रसायन मिसाएको छ कि छैन पत्ता लगाउन सकिन्छ । केरालाई विषादीरहितभन्दा पनि विषादीको प्रभाव कम गर्न केरा किनेर ल्याएको एक–दुई दिनपछि मात्र प्रयोग गर्नु उपयोगी हुने चिकित्सक बताउँछन् । खानुअघि एक घण्टा पानीमा डुबाएर राखियो भने पनि त्यसमा भएको रसायनको मात्रा कम भएर जाने उनको भनाइ छ ।