- २४ भाद्र २०८३, बुधबार / Sep 9, 2026
बजारमा गुणस्तरहीन औषधि बिक्री भइरहेको गुनासो आएपछि स्वास्थ्य तथा जनसङ्ख्या मन्त्री पदम गिरीले अनुगमन बढाउन निर्देशन दिएका छन् । मानव स्वास्थ्यमा खेलवाड गर्ने जो सुकैलाई कडा कारबाही गरिने भन्दै मन्त्री गिरीले मङ्गलबार औषधि व्यवस्था विभागको निरीक्षणमा निस्किए ।
मन्त्री गिरीले अनुगमन गरेर छिटो भन्दा छिटो रिर्पोट बुझाउन समेत विभागलाई निर्देशन दिए । अनुगमन गर्ने जनशक्ति छैनन् भनेर जनताको स्वास्थ्यमा खेलबाड गर्ने छुट विभागलाई नभएको भन्दै उनले प्रभावकारी कार्ययोजना बनाएर जनताले अनुभूत गर्न सक्ने परिणाम मुखी काम गर्न निर्देशन दिए ।
देशभरका फार्मेसीहरुको अनुगमन गर्न निर्देशन दिदै मन्त्री गिरीले सातै प्रदेशमा औषधि विभागका कार्यालय स्थापना गर्नुपर्ने बताए । अनुगमन र नियमनलाई प्रभावकारी बनाएर जान ठोस योजनाका साथ छिटो भन्दा छिटो मन्त्रालय आउन विभागलाई आग्रह गरे ।
उक्त कार्यमा मन्त्रालयले सक्दो सहयोग गर्ने प्रतिबद्धता जनाए । अत्यावश्यक औषधि उत्पादनमा नेपाल आफैँ जुट्नुपर्नेमा जोड दिदै आत्मनिर्भर बन्ने योजना र कार्ययोजना बनाउनु पर्नेमा जोड दिए ।
नवीकरण सम्बन्धी काम अनलाइन प्रणालीबाट गराउन निर्देशन दिदै व्यापारीले फार्मेसी दर्ता गरेपछि नवीकरणका लागि हरेक वर्ष काठमाडौं जानुपर्छ भन्ने गुनासो सुनेको बताए । मन्त्री गिरीले गुणस्तरीय सेवा दिने कुरामा झन्झटिलो नियमन र अनुगमनको कुरामा निर्ममतापूर्वक कडाइ गर्न आग्रह गरे ।
