जबरालाई सर्वोच्चमा प्रवेश गर्न नदिने वकिलहरूको घोषणा

काठमाडौं । प्रधानन्यायाधीश चोलेन्द्र शम्सेर जबरालाई सर्वोच्च अदालत प्रवेश गर्न नदिने नेपाल बार एशोसिएसनले जनाएको छ । शान्तिपूर्ण आन्दोलनमा प्रहरीको बल प्रयोग भएको भन्दै त्यसको विरोधमा जबरालाई अदालत प्रवेश निषेध गर्ने घोषणा गरेको हो । आज शुक्रबार सर्वोच्च अदालतको मूलगेटमा धर्ना बस्ने र प्रधानन्यायाधीश जबरालाई सर्वोच्च अदालतमा छिर्न नदिने बार एशोसिएसनकी उपाध्यक्ष रक्षा बस्यालले बताइन् ।

जबराको राजीनामा माग्दै कानुन व्यवसायीहरुले सर्वोच्च अदालत परिसरभित्रै प्रदर्शन गर्दै आएका छन् । बिहीबारको प्रदर्शनमा प्रहरीले बल प्रयोग गर्दा ६ जना कानुन व्यवसायी घाइते भएका थिए । आन्दोलन उत्कर्षमा पुगेपछि सुरक्षाकर्मी परिचालन गरिएको छ । बिहीबारदेखि नै सर्वोच्च अदालत परिसरभित्र नेपाल प्रहरीका अतिरिक्त सशस्त्र प्रहरीको टोली पनि खटाइएको छ ।

प्रधानन्यायाधीश जबराले मन्त्रिपरिषदमा भागबण्डा खोजेको खबर सार्वजनिक भएपछि नेपाल बारले आन्दोलन थालेको छ । आन्दोलन अन्तर्गत नै कानुन व्यवसायीहरुले कुनै पनि मुद्दामा बहस पैरवी नगर्ने निर्णय गरेका छन् । बार र अदालतमा अहिले राजनीति हावी भएको भन्दै नागरिकले गुनासो गर्न थालेका छन् ।