झापामा मङ्गोल नेसनलसहित ३६ दल दर्ता

झापा । चुनावमा भाग लिन जिल्ला निर्वाचन कार्यालय झापामा मङ्गोल नेशनल अर्गनाइजेसनसहित ३६ वटा दल दर्ता भएका छन् । आसन्न स्थानीय तहको निर्वाचनमा भाग लिनका लागि छ वटा राष्ट्रिय दल र ३० अन्य गरी ३६ वटा दल कार्यालयमा दर्ता भएको कार्यालयका सूचना अधिकारी प्रेम न्यौपानेले बताए ।

विसं २०७४ को स्थानीय निर्वाचनमा ३२ वटा दल दर्ता भएर निर्वाचनमा सहभागी भएका थिए भने यसपटक चार नयाँ दल थपिएको सूचना अधिकारी न्यौपानेले बताए । मङ्गोल नेशनल अर्गनाइजेसन, मौलिक जरोकिलो पार्टी, जनमत पार्टीलगायत थपिएका हुन ।

दललाई दर्ता प्रक्रियाका लागि चैत २ देखि चैत ६ गतेसम्म समय दिएको थियो । निर्वाचन आयोगद्वारा निर्धारित मापदण्डअनुसारको जनशक्ति नेपाल सरकार, प्रदेश सरकार र स्थानीय तहबाट काजमा झिकाइ निर्वाचनसम्बन्धी काममा खटाउने भएको छ ।

आवश्यक कर्मचारीलाई कार्यालयमा काजमा ल्याई निर्वाचन प्रक्रियामा खटाइने न्यौपानेको भनाइ छ ।