- ३ भाद्र २०८३, बुधबार / Aug 19, 2026
काठमाडौं । कम्बोडियामा अंग्रेजी कक्षाबाट घर लैजाँदै गरेको डुङ्गा डुब्दा आठ बालबालिकाको मृत्यु भएको छ । मेकोङ नदीमा डुङ्गा डुब्दा तीन जना बेपत्ता भएको प्रहरीले जनाएको छ ।
सानो डुङ्गामा क्षमता भन्दा बढी व्यक्ति सवार रहेको कारण दक्षिणपूर्वी कान्डल प्रान्तमा आफ्नो गन्तव्यबाट करिब ५० मिटर टाढा डुबेको स्थानीय प्रहरी प्रमुख एम थाउले बताए ।
उनले भने, ‘यो दुःखद दुर्घटनामा आठ विद्यार्थीको मृत्यु भएको छ र तीन विद्यार्थीहरू पानीमा डुबेर बेपत्ता छन् ।’ पीडितहरू १२ देखि १५ वर्षका रहेको जनाइएको छ ।
दुई वयस्क, डुङ्गा सञ्चालक र दुई विद्यार्थीको उद्धार गरिएको छ । प्रधानमन्त्री हुनसेनले आफ्नो शोक व्यक्त गर्दै मेकोङको बढेको भारी बाढीको समयमा मानिसहरूलाई सतर्क रहन आग्रह गरे ।
डुङ्गा दुर्घटनाहरु दक्षिणपूर्वी एसियाली राष्ट्रहरूमा सामान्य छन् । नदीको किनारमा बस्ने मानिसहरूको यातायातका प्रमुख साधनको रुपमा डुङ्गा नै रहेको छ ।
