डेँगी संक्रमणबाट बच्न द्रुत प्रतिकार्य समितिको गठन, टोलटोलमा खोज र नष्ट अभियान

भक्तपुर । डेँगीको संक्रमण बढ्न थालेपछि देशका विभिन्न पालिकाहरुले विभिन्न अभियानहरु सञ्चालन गरिरहेका छन् । हालै चाँगुनारायण नगरपालिकाले डेँगी रोकथाम तथा नियन्त्रणका लागि अभियान सञ्चालन गरिरहेको छ ।

नगरपालिकाका स्वास्थ्य शाखा प्रमुख सत्यकुमार दुवालले डेँगी रोग रोकथाम र नियन्त्रणका लागि चाँगुनारायण नगरपालिकाले तयार गरेको योजना अनुरुप वडास्तरमा अभिमुखीकरण, द्रुत प्रतिकार्य समितिको गठन, स्थानीय रेडक्रस लगायत महिला स्वास्थ्य स्वयंसेविका तथा विभिन्न संघसंस्था तथा विद्यालयको सहभागितामा घरधुरी सर्वेक्षण गरी घर घरमा पर्चा वितरण र नगर क्षेत्रमा माइकिङ्ग गर्ने, सबै वडाहरुमा डेँगी नियन्त्रण रोकथाम खोज र नष्ट अभियान सञ्चालन गर्ने, सबै स्वास्थ्य संस्थाहरुलाई डेँगीको सम्भावित जाँचको लागि तयारी अवस्थामा राख्ने जस्ता कार्य सुरु गरेको जानकारी दिए ।

नगरपालिकाका प्रमुख प्रशासकीय अधिकृत चुरामणि पन्थीले नगरपालिका अन्तर्गतका कार्यालय, विद्यालय, सामुदायिक भवनबाट डेँगी रोग रोकथाम तथा नियन्त्रणको मुख्य तरिका खोज तथा नष्ट अभियान शुरु गरेको बताए । समुदायमा डेङ्गुसम्बन्धि जनचेतना फैलाइ समुदायको सहभागितामा रोकथाम र नियन्त्रणका उपायहरु लागू गर्नका लागि पनि समन्वय गर्न निर्देशन दिएको जानकारी दिए ।