- १३ भाद्र २०८३, शनिबार / Aug 29, 2026
काठमाडौं । नेपालगञ्जबाट डोल्पा जुफाल विमानस्थल जान उडेका यात्रु मुगुको ताल्चा विमानस्थल पुगेपछि अच्चममा परेका छन् । समिट एयरको टिकट काटेर दुधे बालकसहित एक महिला यात्रु डोल्पास्थित जुफाल विमानस्थल जाने बोर्डिङ पास बोकेर मुगु पुगेकी हुन ।
समिट एयरको टिकट लिएर उनी नेपालगञ्जबाट नेपाल एयरलाइन्स (नेवानि) को जहाज चढेकी हुन । दुधे बालकसहित डोल्पाको ठूलो भेरी नगरपालिकाकी राजकुमारी बुढा डोल्पा नपुगेर मुगुको ताल्चा विमानस्थल पुगेपछि दुईछक परिन् ।
विमानस्थलबाट सँगसँगै उड्न लागेका दुई जहाजमध्ये उनी मुगुको ताल्चा विमानस्थल जाने नेपाल एयरलाइन्सको जहाज चढेकी रहिछिन् । यसमा उनको गल्ती भन्दा पनि त्यहाँको सुरक्षा निकाय र कर्मचारीको लापरबाहीका कारण उनी मुगु पुगेकी छन् ।
दुवै एयरलाइन्सका कर्मचारीको कमजोरीका कारण डोल्पा उडेकी बुढा मुगु पुगेको नेपाल एयरलाइन्सका उच्च अधिकारीले बताए । एक जहाजका यात्रु अर्को जहाजमा चढ्दा ग्राउण्डमा खटिएका कर्मचारीले किन हेरेनन् ? कुरा यही निर छ ।
‘बोर्डिङ पास लिइसकेका यात्रु छुट्दा समिटले पनि तत्काल सोधखोज किन गरेन ? दुवै एयरलाइन्सका कर्मचारीको कमजोरीलाई कसरी हेर्ने ? घटनाबारे अनुसन्धान भइरहेको प्रहरीले बताएको छ । बुढाले सुरक्षा माग गरेपछि हवाई सुरक्षामै कमजोरी देखिने गरी भएको गम्भीर लापरबाही बाहिर आएको हो ।
मंगलबार बिहान भएको यो घटनापछि नेपाल एयरलाइन्सको सोही जहाजबाट ती यात्रुलाई आजै नेपालगञ्ज फर्काइएको नेवानिका कर्मचारीले बताए । घटनाबारे जानकारी प्राप्त भएपनि विस्तृत विवरण नआएको नेपालगञ्जस्थित नेपाल नागरिक उड्डयन प्राधिकरण कार्यालयका प्रमुख सुरेश खनालले बताए ।
