तराईमा मच्चियो होलीको रौंनक

काठमाडौं । रङहरुको पर्व होली आज तराईमा हर्षोल्लासका साथ मनाइँदै छ । रङ र अबिर दलेर मनाउने यो पर्व विभिन्न उमेर समूहका मानिसले समूह बनाएर मनाइरहेका छन् ।

विशेषगरी बालबालिकाले पिचकारी खेलेर पर्वको रौनक बढाए छ । कला र संस्कृतिले भरिपूर्ण नेपालमा देशैभर उत्साहका साथ मनाइने फागु पूर्णिमा हिजो पहाड तथा हिमाली जिल्लामा मनाईयो भने आज तराईका जिल्लामा धुमधामसँग मनाइँदै छ ।

पर्वका बेला घरपरिवार, आफन्त, इष्टमित्र तथा साथीभाइ एकापसमा रङमा रङ्गिएर उल्लासपूर्वक वातावरणमा नाचगान गरी रमाइलो गरिरहेका छन् ।

होली पर्वमा कुनै पनि अप्रिय घटना हुन नदिन प्रहरीसमेत परिचालन गरिएको छ । होली पर्वका कारण बजारमा चहलपहल निकै बढेको मोरङका प्रहरी उपरीक्षक जनार्दन जिसीले बताए ।