दुई करोड काण्डमा रास्वपा सांसद श्रेष्ठ

पोखरा । साथी किसान सहकारी संस्थाको झन्डै १ करोड रकम हिनामिना गरेको राष्ट्रिय स्वतन्त्र पार्टीका सांसद डा. ढाकाकुमार श्रेष्ठलाई आरोप लागेको छ।

पदबाट हट्दै गर्दा श्रेष्ठले नयाँ कार्यसमितिलाई हिसाब नबुझाई जिम्मेवारीबाट पन्छिएपछि यस्तो आरोप लागेको छ । त्यसकै विषयमा पुरानो र नयाँ सञ्चालक समितिका पदाधिकारीबीच उनकै मेडिकलमा छलफल र बहस चलिरहेको छ ।

डा. श्रेष्ठले आफू मन्त्री बन्न २ करोड रकम चाहिएको भन्दै मेडिकल व्यवसायी दुर्गा प्रसाईंसँग गरेको फोन संवादको अडियो पनि सार्वजनिक भएको छ । उक्त अडियोमा आफू स्वास्थ्यमन्त्री बन्न लागेको र त्यसका लागि पार्टीलाई साढे २ करोड रुपैयाँ बुझाउनुपर्ने भन्दै प्रसाईंसँग रकमका विषयमा कुरा गरेको सुनिन्छ छ ।

नयाँ काण्ड आएपछि डा. श्रेष्ठलाई यो के हो ? भनेर प्रश्न राखेको बैठकमा सहभागी एक जनाले बताए । रकम हिनामिनामा आफ्नो नाम देखिए सबै रकम तिर्न आफू तयार रहेको श्रेष्ठले बताएको छलफलमा सहभागीको भनाइ छ।