दैलेखको आठबीस नगरको छेपाडी गाउँमा पहिरो

दैलेख । अविरल वर्षाका कारण दैलेख जिल्लाको आठबीस नगरपालिका वडा नं.९ स्थित छेपाडी गाउँका विभिन्न टोलमा जमीन भासिने र पहिरो जाने गर्दा बस्तीहरु जोखिममा रहेका छन । हाल मानवीय क्षति नभए पनि विभिन्न स्थानमा गएको पहिरो र जमीन भासिने कारण स्थानीयहरु त्रसित बनेका छन । गत हप्ता देखि निरन्तर परेको झरीको कारण जमीन भत्किनुका साथै मुल बस्तीमा पहिरो गएको स्थानीय शिक्षक कलमबहादुर सिजापतिले बताएका छन ।

उनका अनुसार गाउँका कट्धारा, आदर्श प्रा.वि. छडाकाफल, बिरिया लगायतका स्थानमा जमीन भासिएको छ भने मेहलगाउँ टोल र गणेश आधारभुत विद्यालय, पूर्छा टोलमा पहिरो गएको छ । लगातारको वर्षाले गलेको जमीनमा निरन्तर पानी परेमा पहिरो जाने र स्थानीय वासिन्दाको उठीबास गराउने संभावना रहेको स्थानीय पशुपति माध्यमिक विद्यालयका प्रधानाध्यापक दलबहादुर सिजापतिले बताएका छन ।

मेहेलगाउँ टोलको दलित बस्तिमा सामुदायिक भवनको पूर्व र पश्चिमतर्फ ठुलो पहिरो गएको छ भने पश्चिम तर्फ घरखेत टोलका बासिन्दाहरुले बसाई सारेको स्थानीय युवा नवीनकुमार सिजापतिले बताएका छन । स्थानीय बासिन्दाहरुका अनुसार वर्षाले–राकम–तिलेपाटा–छेपाडी खण्डको बाटो ठाउँठाउँमा भत्किएको र जोखिम न्यूनिकरणका लागि सरोकारवाला निकायले समयमा नै आवश्यक सावधानी सहित पहल गर्नु अत्यावश्यक देखिन्छ ।