- ३ भाद्र २०८३, बुधबार / Aug 19, 2026
भक्तपुर । नगरकोट सडकखण्ड निर्माणको काम तत्काल सम्पन्न गर्न चाँगुनारायण नगरपालिकाले माग गरेको छ । कमलविनायकबाट भत्केको पाटी हुँदै नगरकोट जाने सडक निर्माणको लागि ८ वर्षअघि ठेक्का सम्झौता भए पनि अलपत्र परेको भन्दै माग गरेको हो ।
तत्कालीन भौतिक पूर्वाधार तथा यातायात मन्त्रालय, सडक विभाग, सडक सुधार आयोजना कार्यालय बबरमहलले भारतीय निर्माण कम्पनी एआइपीएल र नेपाली निर्माण कम्पनी सैलुङ कन्सट्रक्सनलाई ठेक्का दिएको थियो । १५ किलोमिटर लामो सडक २०७३ असार ३ गतेसम्म सम्पन्न गर्ने सम्झौता थियो ।
७ पटक सम्झौताको म्याद थप गर्दा पनि सडकको काम हुन नसकेपछि नगरपालिकाले निर्माणको काम तत्काल सम्पन्न गर्न माग गरेको हो । सडक निर्माणका लागि असोज २८ गते अन्तिम म्याद अवधि भए पनि चैत मसान्तसम्म थप गरिएको छ । सडक निर्माण अलपत्र पर्दा स्थानीय दैनिक धुलो र धुवाँका कारण सास्ती खेप्दै आएका छन् ।
निर्माण कम्पनीको मनपरीले निर्माणमा ढिलाई भएको स्थानीयको गुनासो गरेपछि नगरपालिकाले माग गरेको हो । नगरपालिकाले अन्तिम म्यादसम्म सडक निर्माण नभएमा पालिकाको नेतृत्वमा आन्दोलन गर्ने जनाएको छ ।
