नाकामा नागरिकले गर्न पाएनन् आवतजावत

काठमाडौँ । सरकारले भारत र चीन तर्फका थप १६ वटा नाका सञ्चालन गर्ने निर्णय गरे पनि सबै नाकामा सर्वसाधारणले आवतजावत गर्न पाएका छैनन् । गृह मन्त्रालयबाट जानकारी नआएका कारण नाका सञ्चालन गर्न नसकिएको प्रशासनले जनाएको छ ।

कोरोना संक्रमणका कारण लकडाउनसँगै गत चैतदेखि बन्द सीमा नाका बिहीबारदेखि सरकारले खुलाउन सर्कुलर गरिसकेको छ । यता
लुम्बिनी प्रदेशको रूपन्देहीको बेलहिया र बाँकेको जमुनाह नाका पहिले नै पैदल आउजाउ खोलिएको थियो ।

कपिलवस्तुका कृष्णनगर र मर्यादपुर नाका खुलेको सार्वजनिक भएपनि निर्देशन नआएकाले नाका नखोलेको इप्रका कृष्णनगरका प्रमुख निरीक्षक सुकदेव पौडेलले बताए । पश्चिम नवलपरासीको भारतीय नाका बन्द छ ।

महेशपुर मूल भन्सार र चारवटा छोटी भन्सार पनि बन्द रहे । यसअघि इलामको पशुपतिनगर, झापाको काँकडभिट्टा र मोरङको रानी नाकाबाट मात्रै सर्वसाधारणको सहज आवागमन खोलिएको थियो । सुनसरीको भन्टाबारी नाकाबाट भने शुक्रबारदेखि नै सर्वसाधारणको आउजाउ सुरु भएको छ ।