नाग्म पहिरोमा चार जनाको मृत्यु, तीन बेपत्ता

कालीकोट । तिलागुफा नगरपालिका–१ नाग्म बजारमा पहिरो जाँदा चार जनाको ज्यान गएको छ । पहिरोले तीन घर पुरिँदा तीन जना बेपत्ता भएका छन् । स्थानीय पर्याक शाहीको घर पहिराले पुरेको छ ।

पहिरामा परी ४० वर्षीय पर्याक शाही, उनकी सात वर्षीया छोरी हिमा शाही, पाँच वर्षीय छोरा निराजन शाही र दुई वर्षीय छोरा अक्कल शाहीको मृत्यु भएको जिल्ला प्रहरी नायब उपरीक्षक श्यामबाबु ओलियाले बताए । मृतक शाहीकी श्रीमती पुण्या शाही र अर्जुन हमालको उद्धार गरि उपचार जुम्लास्थित कर्णाली स्वास्थ्य विज्ञान प्रतिष्ठानमा भइरहेको छ ।

बेपत्ताको पहिचान खुल्न नसकेको र खोजी कार्य जारी रहेको प्रहरीले जनाएको छ । घटनास्थल जुम्ला र कालीकोट जिल्लाको सिमाना नजिक कर्णाली राजमार्गको कालीकोट सडक खण्डमा पर्दछ । घटनामा के कति मानवीय क्षति भएको भन्ने एकिन विवरण आउन बाकी छ ।