- १८ असार २०८३, बिहीबार / Jul 2, 2026
काठमाडौं पछिल्लो समय कोरोना संक्रमण बढ्न थालेको छ । सोमबार एकै दिन नेपालमा १ सय २४ जना कोभिड–१९ का संक्रमित भेटिएपछि कोरोना सक्रमण तीव्ररुपमा फैलिएको देखिएको हो । दैनिक संक्रमितको संख्या बढ्दै जाँदा सक्रिय संक्रमितको संख्या समेत बढेको हो । हाल देशभर ४ सय ४४ जना सक्रिय संक्रमित रहेका छन्।
सोमबार २९ जना संक्रमित संक्रमणमुक्त भएका छन्। चैतको पहिलो हप्तासम्म निकै न्यून रहेको संक्रमणदर नेपालमा पछिल्लो डेढ हप्ता देखि उकालो लागेको छ। सक्रिय संक्रमितमध्ये हाल २१ जना संक्रमित संस्थागत आइसोलेसनमा छन्। १० जना संक्रमितको आइसियु र ४ जना भेन्टिलेटरमा उपचाररत रहेको मन्त्रालयले जनाएको छ।
स्वास्थ्य तथा जनसंख्या मन्त्रालयले सार्वजनिक गरेको विवरण अनुसार सोमबार २ हजार ५६६ जनामा गरिएको परीक्षणमा १२४ जना संक्रमित भेटिएका हुन्। त्यसैगरी नेकपा माओवादी केन्द्रका उपमहासचिव जनार्दन शर्मालाई कोरोना संक्रमण भएको छ।
पूर्वअर्थमन्त्री समेत रहेका शर्माले सामाजिक संजालमार्फत् आफूलाई तेस्रोपटक कोरोना संक्रमण भएको उल्लेख गरेका छन्। ‘कोभिड–१९ द्वारा तेस्रो पटक संक्रमित।’ शर्माले लेखेका छन्, ‘पहिलो र दोस्रो पटकको संक्रमण जस्तो नभए पनि कोभिड त कोभिड नै रहेछ।’
