- २९ श्रावण २०८३, शुक्रबार / Aug 14, 2026
काठमाण्डौ । कृषि गर्ने जमिन घट्दा नेपालमा कृषि गर्नेको सङ्ख्या बढेको छ । कृषि गर्ने परिवार सङ्ख्या तीन लाखले बढेको राष्ट्रिय तथ्याङ्क कार्यालयले बिहीवार सार्वजनिक गरेको सातौँ कृषि गणना–२०७८ को तथ्याङ्कले देखाएको छ ।
२०१८ सालदेखि हरेक १० र १० वर्षमा कृषि गणना गर्दै आएको राष्ट्रिय तथ्याङ्क कार्यालय (साविकको केन्द्रीय तथ्याङ्क विभाग) ले २०७८ चैतदेखि ७७ वटै जिल्लामा कृषि गणना कार्यालय स्थापना गरी २०७९ वैशाख ६ देखि जेठ १९ सम्म सातौँ राष्ट्रिय कृषि गणनाको स्थलगत तथ्याङ्क सङ्कलनको काम गरेको थियो ।
विहीबार सार्वजनिक तथ्याङ्कअनुसार देशभर ४१ लाख ३१ हजार परिवार कृषिमा आबद्ध छन् । २०६८ सालमा यस्तो परिवार सङ्ख्या ३८ लाख ३१ हजार थियो । नेपालमा २२ लाख १८ हजार हेक्टर जमिनमा कृषि गरिएको छ । जुन २०६८ सालको तुलनामा तीन लाख आठ हजार हेक्टरले कम हो ।
२०६८ को कृषि गणनामा २५ लाख ३१ हजार हेक्टर जमिनमा खेती गरिएको थियो । नेपालमा १० वर्षको अवधिमा पशुपालन गर्ने कृषक परिवार ३३ लाख ५३ हजार आठ सय ५७ बाट बढेर ३४ लाख पाँच हजार १४ पुगेका छन् ।
