- २ श्रावण २०८३, शनिबार / Jul 18, 2026
काठमाण्डौ । दुईतीन दिन यता काठमाण्डौसहित पहाडी जिल्ला र पूर्वी तराईमा हल्कादेखि मध्यम वर्षा भएको छ । पानी परेसँगै देशका धेरै ठाउँमा गर्मी घटेको छ भने अधिकतम तापक्रम घट्दा गर्मी कम भएको हो । पश्चिम तराईबाहेकका ठाउँमा बुधबार पनि पानी पर्ने सम्भावना छ ।
कोशी, वाग्मती र गण्डकी प्रदेशका केही र अन्य प्रदेशका थोरै पहाडी क्षेत्रमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको मौसमविद् बताएका छन् । कोशी, वाग्मती, गण्डकी र मधेस प्रदेशका पूर्वी क्षेत्रका केही ठाउँको मौसम अहिले आंशिकदेखि सामान्य बद्ली छ । नेपालमा अहिले पश्चिमी वायुसँगै भारतको विहारमा बनेको न्यून चापीय प्रणालीको आंशिक प्रभाव रहेको छ ।
पश्चिम तराईमा भने अझै पनि उखरमाउलो गर्मी छ । पश्चिम तराईमा पानी परेको छैन । अझै एक दुई दिन पश्चिम तराईमा वर्षाको सम्भावना नरहेको मौसमविद्ले जनाएका छन् । दुईतीन दिनसम्म नै पश्चिम तराईमा तातो हावा लू चल्ने सम्भावना रहेको छ ।
