पहिरोमा पुरिएका दुई जनाको शव भेटियो

२० असार २०७७ बझाङ । केदारस्युँ गाउँपालिका–८ मल्लेसीमा शनिबार विहान गएको पहिरोमा पुरिएका दुई जनाको शव भेटिएको छ । अन्य व्यक्तिहरू अझै सम्पर्कविहीन रहेका छन् । पहिरोमा १८ घर पुरिएका छन् । दुई वटा घरमा क्षति पुगेको छ । दुर्गम भएकाले घटनास्थलमा प्रहरीको टोली अझै पुग्न नसकेको स्थानीयले बताएका छन् ।

प्रहरीले घटनाको बारे बुझेपनि मात्र क्षतिको एकिन विवरण आउने उनीहरुले बताएका छन् छन् । पहिरोमा वेपत्ता भएकाहरुको खोजीकार्यमा स्थानीय लागिपरेका छन् । विहान करिब २ बजेतिर पहिरो आएको स्थानीय बताए । ४० परिवारको बसोबास रहेको मल्लेसी गाउँमा सदरमुकामबाट नेपाल प्रहरी र सशस्त्र प्रहरीको टोली तथा कालंगा जलविद्युत आयोजनाको सुरक्षार्थ खटिएको नेपाली सेनाको टोली घटनास्थल पुग्ने प्रयास गरिरहेको प्रमुख जिल्ला अधिकारी कमल राज भण्डारीले जानकारी दिए ।

बाटोको समस्या भएकाले उत्त गाउँमा पुग्न खोलैखोला भएर जानुपर्ने हुन्छ । तर खोलामा बाढी आएको र माथिबाट पहिरो पनि खसिरहेका कारण उद्धार टोली त्यहाँ पुग्न नसके प्रहरीको भनाई छ । घटनास्थलमा पठाउन हेलिकप्टरको खोजी गरिएको प्रमुख जिल्ला अधिकारी भण्डारीले बताए ।