पहिलो पटक २७ वर्षीय सुजन बागले जिब्रो छेडाउँदै

काठमाण्डौ । वैशाख २ गते मनाइने ‘जिब्रो छेड्ने जात्रा’मा पहिलो पटक २७ वर्षीय सुजन बाग श्रेष्ठले जिब्रो छेडाउदै छन् ।
भक्तपुरको मध्यपुरथिमि नगरपालिका बोडेमा हरेक वर्ष बैशाख २ गते मनाइने विश्व प्रसिद्ध ‘जिब्रो छेड्ने जात्रा’ मा २७ वर्षीय सुजन बाग श्रेष्ठले पहिलो पटक जिब्रो छेडाउने भएका हुन ।

नवौँ पटक जिब्रो छेडेका बोडेका ५० वर्षीय बुद्धकृष्ण बाग श्रेष्ठको कान्छो छोरा सुजनले यस वर्ष जिब्रो छेडाउने जनाएको हो । कृष्णचन्द्र बाग श्रेष्ठले १२ पटक जिब्रो छेडाएपछि उनका भाइ बुद्धकृष्ण बाग श्रेष्ठले नौ पटकसम्म जिब्रो छेडाएर जात्रालाई निरन्तरता दिएका थिए ।

मध्यपुरथिमि क्षेत्रमै बशाख २ गते नै ३२ खटसहितको सिन्दुर जात्रा मनाइँन्छ । बिस्केट जात्राको अवसरमा मध्यपुरथिमिका स्थानीयवासीले बिहानैदेखि हर्षोल्लासका साथ सिन्दुर खेलेर सिन्दुर जात्रा मनाउने गर्दछन् ।

जिब्रो छेड्ने व्यक्तिले तीन दिनअघि देखि नै केही नखाइ व्रत बस्नुपर्ने नियम छ । जिब्रो छेड्ने व्यक्तिले महादीप बोकेर नगर परिक्रमा गरेर बोडेको महालक्ष्मी मन्दिरमा पुगेर सुइरो झिकेपछि जात्रा सम्पन्न हुन्छ ।