- ३१ आश्विन २०८३, शनिबार / Oct 17, 2026
जुम्ला । मुगु पाटनमा यार्सा टिप्न गएका जुम्लाका ३ जना बेपत्ता भएका छन् । पातारासी गाउँपालिकाका २ तल्फि गाउँका ३ जना बेपत्ता भएको गाउँपालिका अध्यक्ष पूर्ण सिंह बोहराले बताए ।
पातारासीका १५ जना यार्सा टिप्न गएमा मध्य ३ जना हिम पहिरोमा पुरिएको भन्ने अपुष्ट खबर आएको र विस्तृत खबर आउन बाँकी रहेको जिल्ला प्रशासन कार्यालय जुम्लाका प्रमुख जिल्ला अधिकारी जय कुमार घिमिरेले बताए ।
शुक्रबारनै सो घटना भएको र टाढा भएकाले बल्ल खबर भएको उनको भनाइ छ । मुगु र डोल्पाको सिमामा पाटन च्यार्खु लेखमा ३ जना बेपत्ता भएको खबर आएको जिल्ला प्रहरी कार्यालय मुगुका प्रहरी निरीक्षक तथा निमित्त कार्यालय प्रमुख सुदर्शन पन्थीले बताए ।
जुम्ला पातारासी २ तल्फि गाउँका ४२ वर्षीय तारासिंह सार्की, ३८ वर्षीय पूर्ण सिंह सार्की र ३६ वर्षीय वीर बोहरा रहेका छन् । मौसम खराबका कारण जेठ ४ गते मात्रै यार्सा टिप्ने भनिएको भए पनि उनीहरू अर्को बाटोबाट गएको खबर आएको प्रहरी निरीक्षक तथा निमित्त कार्यालय प्रमुख सुदर्शन पन्थीले बताए ।
बेपत्ता भएका ३ जनाको साथमा १५ जनाको समूह भएको प्रहरीले जनाएको छ ।
