- ३ श्रावण २०८३, आईतवार / Jul 19, 2026
काठमाडौं । मनाङबाट निर्वाचित नेपाली कांग्रेसका सांसद टेकबहादुर गुरुङ सहित ९ जनालाई विशेष अदालतले भ्रष्टाचारी ठहर गरेको छ । ५ जनाले आरोपबाट सफाइ पाएका छन् ।
पूर्वमन्त्री गुरुङसहित तत्कालीन महिला बालबालिका तथा समाजकल्याण मन्त्री बद्रीप्रसाद न्यौपाने दोषी ठहर भएका हुन् । विशेष अदालतको फैसलापछि गुरुङ सांसद पदबाट निलम्बित हुने निश्चित भएको छ ।
उनी सर्वोच्च अदालत गएर सफाइ पाएमा मात्रै सांसदको रुपमा क्रियाशिल हुन पाउँनेछन् । मनाङबाट निर्वाचित उनी सांसद भएर काम गर्न पाएका छैनन् । भ्रष्टाचार मुद्दाका आरोपितहरु निर्वाचित भए पनि स्वतः निलम्बित हुने कानूनी व्यवस्था छ ।
जग्गा भाडा अनियमितताको मुद्दामा तत्कालिन मन्त्री एवं समाजकल्याण परिषदका अध्यक्ष बद्रीप्रसाद न्यौपाने, उपाध्यक्ष प्रमोद मेहता, कोषाध्यक्ष कुञ्ज विहारी प्रसाद चौधरी, सदस्यहरु मोहनराज शर्मा, मदन कुमार लाल कर्ण, हरि न्यौपाने र सदस्य सचिव रविन्द्र कुमार यादवलाई अदालतले दोषी ठहर गरेको हो ।
मेलाका सञ्चालकहरु रविन्द्र गुरुङ र टेक बहादुर गुरुङ पनि भ्रष्टाचार दोषी ठहर भएका छन् । विशेष अदालतका अध्यक्ष श्रीकान्त पौडेल, सदस्यहरु शालिग्राम कोइराला र बलभद्र बास्तोलाले गुरुङलाई भ्रष्टाचारको मतियार भएको ठहर गरेको हो ।
भृकुटीमण्डपस्थित जग्गा लिजका लिने क्रममा भ्रष्टाचार भएको भनी अख्तियार दुरुपयोग अनुसन्धान आयोगले २१ माघ २०७५ मा १४ जना विरुद्ध भ्रष्टाचार मुद्दा दायर गरेको थियो ।
