- २१ आश्विन २०८३, बुधबार / Oct 7, 2026
काठमाडौं । प्रतिनिधिसभातर्फ १ सय ५६ सिटको अन्तिम मतपरिणाम सार्वजनिक भएको छ । कुल १६५ निर्वाचन क्षेत्रमध्ये बिहानहानसम्म १५६ वटा सिटको टुङ्गो लागेको छ भने अझै ९ वटा क्षेत्रको परिणाम आउन बाँकी रहेको निर्वाचन आयोगले जनाएको छ ।
हालसम्म सबैभन्दा धेरै नेपाली कांग्रेसले ५३ वटा सिटमा जीत हासिल गरेको छ भने नेकपा एमालेले ४१ वटा क्षेत्रमा जीत हासिल गरेको छ । नेकपा माओवादी केन्द्र १७ सिटमा विजयी भएको छ ।
नेकपा एकीकृत समाजवादीले १०, राष्ट्रिय स्वतन्त्र पार्टी र राष्ट्रिय प्रजातन्त्र पार्टीले ७÷७, जनता समाजवादी पार्टीले ६ र लोकतान्त्रिक समाजवादी पार्टीले ४ सिट जितेको छ । नागरिक उन्मुक्ति पार्टीले ३, नेपाल मजदुर किसान पार्टी, राष्ट्रिय जनमोर्चा र जनमत पार्टीले १/१ सिट जित्दा ५ ठाउँमा स्वतन्त्र उम्मेदवार विजयी भएका छन्।
मतगणना चलिरहेका ६ मध्ये ३ स्थानमा नेपाली कांग्रेस, २ स्थानमा नेकपा एमाले र एक स्थानमा राष्ट्रिय स्वतन्त्र पार्टीले अग्रता लिइरहेका छन् । कांग्रेस उम्मेदवारहरु धनुषा ३ मा महेन्द्र यादव, उदयपुर १ मा डा.नारायण खड्का र सुनसरी ४ मा ज्ञानेन्द्रबहादुर कार्कीले अग्रता लिइरहेका छन् ।
कार्कीको निर्वाचन क्षेत्र सुनसरी ४ मा विवाद हुँदा मतगणना रोकिएको छ । मतगणना जारी रहेका इलाम १ मा एमालेका महेश बस्नेत र सुनसरी ३ मा एमालेकै भगवती चौधरी अगाडि छन्। सुनसरी क्षेत्र नम्बर १ मा राष्ट्रिय स्वतन्त्र पार्टीकी गोमा तामाङले अग्रता लिइरहेकी छन् ।
बाजुरा, दोलखा र स्याङ्जा २ मा गरी तीन निर्वाचन क्षेत्रको मतगणना नै सुरु भएको छैन।
