बँदेललाई थापेको पासोमा परि एकै परिवारका तीन जनाको मृत्यु

बर्दिया । बँदेल मार्न राखेको विद्युतीय पासोमा परि एकै परिवारका तीन जनाको मृत्यु भएको छ। गएराति ठाकुरबाबा नगरपालिकामा एकै परिवारका तीन जनाको ज्यान गएको हो ।

बँदेल मार्न राखेको करेन्टको पासोमा परेर ठाकुरबाबा नगरपालिका–३ का ३२ वर्षका बालकृष्ण थारु, उनकी श्रीमती २९ वर्षकी सुनिता थारु र बालकृष्णकी भाउजु ४३ वर्षकी बेलमती थारुको मृत्यु भएको इलाका प्रहरी कार्यालय भुरिगाउँका प्रहरी निरीक्षक कविराज रोकायाले बताए ।

सुरुमा एक जनालाई करेन्ट लागेपछि बचाउने क्रममा अरु दुई जनालाई पनि करेन्ट लागेको प्रहरी निरीक्षक रोकायाले बताए। बँदेललाई पासो थाप्ने ८३ वर्षीय राजबहादुर शाहीलाई भने प्रहरीले पक्राउ गरि अनुसन्धान थालेको छ।