बसन्तपुरमा ठड्याइयो चीर

काठमाडौं । बसन्तपुरमा रंगचंगी ध्वजाले सजाइएको तीनतले चीर ठड्याइएको छ ।

हनुमानढोका दरबारको गद्दी बैठकको दक्षिणतर्फ चीर ठड्याइपछि देशभर होली पर्व सुरु भएको मानिन्छ ।

आज बिहान ७ः४५ बजेको साइतमा मानन्धर समुदायले रंगीचंगी ध्वजासहितको चीर ठड्याएका हुन् ।

उनीहरुले एकअर्कालाई अबिर दलेर होली पर्व सुरु भएको जनाउ दिए ।

आजै पशुपति, हनुमानढोका दरबारको सुन्दरीचोक, ललितपुरको पाटन दरबार क्षेत्रको कृष्णमन्दिर परिसरमा पनि रंगीचंगी कपडा झुण्ड्याएर होली सुरु भएको जनाउ दिने गरिन्छ ।

यस वर्ष होली पर्वको मुख्य दिन फागुन २२ र २३ गते परेको छ ।

२२ गते हिमाली तथा पहाडी जिल्लामा र २३ गते तराई जिल्लामा होली मनाइन्छ । यस दिन सार्वजनिक विदा समेत दिइएको छ ।