- ९ श्रावण २०८३, शनिबार / Jul 25, 2026
सिन्धुली । सिन्धुलीमा ट्राफिक व्यवस्थापनमा समस्या भएको छ । भारतीय नम्बर प्लेटका गाडीका कारण ट्राफिक व्यवस्थापनमा समस्या भएको हो ।
साउनदेखि नेपालका तीर्थ स्थलहरुमा भारतबाट आउने भारतीय नम्बर प्लेटका गाडी तथा मोटरसाइकलका कारण ट्राफिक व्यवस्थापनमा समस्या भएको भन्दै सीमा क्षेत्र सीतामढी,पटना, रक्सौल र जोगवनी लगाएतका स्थानबाट नेपाल प्रवेश गर्ने चारपाङ्ग्रे हलुका सवारी साधन तथा मोटरसाइकलले नेपाली भन्सार बिल नतिरी नेपाल प्रवेश गर्ने गरेको पाइएको ट्राफिकले बताएको छ ।
कतिपय चालकको चालक अनुमति पत्र समेत नहुँदा सिन्धुली जिल्लाको वीपी, मदन भण्डारी र पुष्पलाल लोकमार्गमा ट्राफिक प्रहरीलाई सास्ती भएको छ । गेरु वस्त्रमा सिन्धुली जिल्लाको मधुगंगा महादेव, खोटाङ जिल्लाको हलेसी र काठमाडौंको पशुपतिनाथ लगाएतका तीर्थस्थलको यात्राका लागि तीर्थयात्रीहरु लिएर गुडने सवारीका साधनहरुले तीर्थयात्री भन्दै चेकजाँच पनि छुट हुनुपर्ने बताउने गरेको ट्राफिक प्रहरीले गुनासो गरेका छन् ।
तीर्थयात्रीहरुले यात्रा गर्दा जोखिम हुने र कैयौं दुर्घटना समेत भई जनधनको क्षति भइरहेको भन्दै चेक जाँँचका क्रममाविना भन्सार बिल भएका र चालक अनुमति बेगरका साबिकका साधनहरुलाई नियन्त्रणमा लिएर ट्राफिक प्रहरीले कारबाही समेत चलाएको छ । ट्राफिक प्रहरी कार्यालय सिन्धुलीको तथ्यांक अनुसार साउन महिना सुरु भएयता सिन्धुलीको वीपी, मदन भण्डारी र पुष्पलाल मध्यपहाडी लोकमार्गमा १२ हजार ३ सय ५० भारतीय नम्बर प्लेटका साधनहरुले आवागमन गहेका छन् ।
