भारतीय व्यवसायीलाई नेपालमा लगानी गर्न अर्थमन्त्री महतको आह्वान

काठमाडौं । नेपालमा लगानी गर्न भारतीय व्यापारीलाई अर्थ मन्त्रालयले आह्वान गरेको छ । प्रतिफलको दृष्टिले उर्बर रहेकाले निर्धक्कसँग नेपालमा लगानी गर्न आह्वान गरेका. हो । भारतको गुजरात चेम्बर अफ कमर्सले आयोजना गरेको कार्यक्रमलाई सम्बोधन गर्दै अर्थमन्त्री डा. प्रकाशशरण महतले व्यवसायीलाई आह्वान गरेका हुन् ।

भारतसँग दश हजार मेघावाट जलविद्युत् निर्यात गर्ने सहमति भएको र यसले विद्युत् खपत गर्ने उद्योगलाई समेत प्रशस्तै सम्भावनाका ढोका खोलेको उनको भनाइ छ । नेपालमा जलविद्युत् बाह्रै महिना सस्तो दरमा उपलब्ध हुने अवस्था आइसकेको भन्दै नेपालबाट उत्पादित सामानले भारतमा पनि सहज पहुँच प्राप्त गर्ने हुँदा लगानीमा सहजता बढ्दै जाने उल्लेख गरे ।

नेपालमा सूचना प्रविधिको विकासले गति लिन थालेको र प्रशस्तै जनशक्तिको उपलब्धताले गर्दा लगानीकर्तालाई झनै आकर्षित गर्नसक्ने, भारतमा भन्दा सस्तो दरमै जनशक्ति उपयोग गर्न सकिने हुँदा प्रतिस्पर्धी क्षमतासमेत बढ्न सक्ने सम्भावना रहेको मन्त्रीले महतले बताए ।

गुजरातका उद्योगी व्यवसायी नेपालमा लगानी विस्तार तथा व्यवसाय स्थापना गर्न इच्छुक रहेको गुजरात उद्योग वाणिज्य सङ्घका वरिष्ठ उपाध्यक्ष सन्दीप इन्जिनियरले बताए । त्यसका लागि प्रक्रियागत सहजीकरण गरिदिन मन्त्री महतलाई उनले अनुरोध गरे ।