- १ भाद्र २०८३, सोमबार / Aug 17, 2026
रुपन्देही । कोटहीमाई गाउँपालिकाका इन्जिनियर अरविन्दकुमार यादवविरुद्ध भ्रष्टाचार मुद्दा दायर भएको छ । अख्तियार दुरुपययोग अनुसन्धान आयोगको टोलीले असार २० गते उनलाई रंगेहात पक्राउ गरेको थियो ।
४५ हजार रुपैयाँ घुस रकमसहित पक्राउ परेका यादवविरुद्ध अख्तियारले सोमबार विशेष अदालतमा मुद्दा दायर गरेको हो । कोटहीमाई गाउँपालिका ७ अन्तर्गतको सडक पीसीसी ढलान र ग्राबेल गर्ने कार्यको नापजाँचपश्चात भुक्तानी दिने प्रयोजनार्थ सेवाग्राहीसँग यादवले ४५ हजार रुपैयाँ घुस लिइसकेको अवस्थामा पक्राउ गरिएको प्रवक्ता भोला दाहालले बताए ।
अनुसन्धानको सिलसिलामा इन्जिनियर यादवले सेवाग्राहीसँग ४५ हजार रुपैयाँ घुस माग गरी लिएको पुष्टि हुन आएकोले यादवले गरेको कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएको हुँदा सोहीअनुसारको बिगो कायम गरी भ्रष्टाचार निवारण ऐन २०५९ को दफा ३ को उपदफा (१) वमोजिम जरिवाना र दफा ३ को उपदफा (१) को देहाय (ख) बमोजिम कैद सजाय हुन माग दाबी लिई विशेष अदालतमा आरोपपत्र दायर गरिएको छ ।
