भूकम्पमा परी ज्यान गुमाएका १ सय ५७ जनाको शव परिवारलाई बुझाइयो

काठमाडौँ ।जाजरकोट भूकम्पमा परी मृत्यु भएका एक सय ५७ जनाको शव सनाखत गरी गृह मन्त्रालयले आफन्तलाई बुझाइएको छ । खोज, उद्धार तथा राहत व्यवस्थापनमा सरकारका सबै निकाय सक्रिय रहेको जानकारी दिँदै मन्त्रालयका प्रवक्ता नारायणप्रसाद भट्टराईले घाइतेहरू उपचारपछि घर फर्कन थालेको बताए ।

भूकम्पमा परी ९९ महिला र ५८ पुरुषको मृत्यु भएको छ । जाजरकोटमा ७२ महिला र ३३ पुरुष गरी एक सय पाँच तथा रुकुम पश्चिममा २७ महिला र २५ पुरुष गरी ५२ जना रहेको मृत्यु भएको प्रवक्ता भट्टराईले बताए । घाइते दुई सय ५६ मध्ये एक सय ४६ जना उपचारपछि घर फर्किएका छन् ।

एक सय १० जना उपचाररत छन् । यसैबीच, प्रहरी प्रधान कार्यालयले जाजरकोट भूकम्पमा अहिलेसम्म नौ सय १० वटा घरमा पूर्ण क्षति भएको छन् भने दुई हजार आठ सय ६१ घरमा आंशिक क्षति भएको छ ।