- २८ श्रावण २०८३, बिहीबार / Aug 13, 2026
२० असार २०७७ सिराहा । लहान बजारमा अटोरिक्सा, टेम्पो चालक मजदुरहरु आन्दोलित भएका छन् । उनिहरुले मजदुर मारा सरकार मुर्दावाद भन्दै नाराजुलुश सहित राहत र रोजगारीको माग गर्दै प्रदर्शन गरेका हुन। ई–रिक्सा तथा टेम्पो चालक संघको नेतृत्वमा चालकहरूले ई–रिक्सा र टेम्पोसहित निकालेको र्यालीले नगरका विभिन्न भाग परिक्रमा गरि सभा समेत गरे।
कोरोना महामारीका कारण सरकारले लामो समयसम्म सार्वजनिक यातायात ई–रिक्सा, टेम्पो, ठेलालगायत मझौला सवारी सञ्चालनमा प्रतिबन्ध लगाएपछि निकै मारमा परेको भन्दै बाध्य भएर नाराजुलुशमा उत्रिनु परेको बताएका छन् । ‘मजदुरलाई गरिखान देऊ’ बैंक ब्याज मिनाहा, शतप्रतिशत पीसीआर जाँच लगायतका नारा लेखिएका प्लेकार्ड बोकेर, ई–रिक्सामा टाँसेर उनीहरुले हातमा कालोपट्टी बाँधेर प्रदर्शनमा उत्रिए ।
प्रहरीले सवारीको चाबी खोस्ने, सिट लैजाने र एक हजार रुपैयाँ जरिवाना लिएर दुख दिएको भन्दै आक्रोश व्यक्त गरे । सरकार कि राहत देऊ कि रोजगारी दिऊ नत्र जीविका चलाउन समस्या पर्यो भन्दै उनीहरुले काम गर्ने बातावरण मिलाउन आग्रह गरे । लहान नगरपालिकासँग राहत माग गरेको तर अहिलेसम्म सुनुवाइ नभएको ई–रिक्साचालकका नगर अध्यक्ष मनोज मण्डलले बताए । राहतमा १० अर्ब खर्च सरकारले कहाँ गर्यो ? हामीले राहत पाएका छैनौं भन्दै उनीहरुले गुनासो गरे ।
