- २८ जेष्ठ २०८३, बिहीबार / Jun 11, 2026
काठमाडौं । स्थानीय तह निर्वाचनका लागि जनक शिक्षा सामाग्री केन्द्र लिमिटेडले मतपत्र छाप्ने काम थालेको निर्वाचन आयोगले जनाएको छ ।
निर्वाचनका लागि कुल एक करोड ९४ लाख थान मतपत्र छापिने आयोगका प्रवक्ता शालिग्राम शर्मा पौडेलले बताए । २३ लहर समूहका ७७ प्रकारका मतपत्र छापिन लागेको उनको भनाइ छ ।
जसमा सबैभन्दा कम १६ लहरको मतपत्र डोल्पाको हुनेछ । सबैभन्दा बढी ५६ लहरको मतपत्र काठमाडौँका हुने छ । यसअघि आइतबार एक लाख ८० हजार थान नमुना मतपत्र छापेको थियो ।
मतपत्र छाप्ने काम तीव्रताका साथ अघि बढाएको छ । आयोगले प्राथमिकता निर्धारणका साथ सबैभन्दा पहिला दुर्गम क्षेत्रको मतपत्र छापिने प्रवक्ता पौडेलले बताए ।
मतपत्र छाप्नका लागि सेक्युरिटी प्रेसमा काम गर्ने छुट्टै कर्मचारीलाई खटाइएको छ । नम्बरिङ, प्याकिङ र ब्याण्डिङको सम्पूर्ण काम ती कर्मचारीले गर्नेछन् ।छपाईको सुरक्षा नेपाली सेनाले गर्दै आएको छ ।
नेपाली सेनाको कमाण्डमा नेपाल प्रहरी र सशस्त्र प्रहरीसमेत सुरक्षार्थ खटिएको छ । मतपत्र छाप्ने स्थल वरवर सीसीक्यामेराको समेत व्यवस्था गरिएको छ ।
मतपत्र छपाईको काम २० दिनभित्रमा सकिने जानकारी आयोगलाई दिएको छ । स्वीकृत अन्तिम मतदाता नामावलीबमोजिम एक करोड ७७ लाख ३३ हजार ७२३ मतदाता छन् ।
कुल मतदाताको ८ देखि १५ प्रतिशतसम्म थप मतपत्र छापिने प्रवक्ता पौडेलले बताए।यसैबीच निर्वाचन आयोगले आज स्थानीय तहको चुनावमा भाग लिने राजनीतिक दलहरूसँग छलफल गर्दैछ।बिहान साढे ११ बजे छलफल हुने निर्वाचन आयोगका प्रवक्ता शालिग्राम शर्मा पौडेलले बताए ।
स्थानीय निर्वाचनमा भाग लिने ७९ वटा दलहरूलाई छलफलका लागि बोलाइएको हो। ०७४ को निर्वाचनमा आयोगले राजनीतिक दलसँग निर्वाचन आचारसंहिता परिपालना गर्ने गराउने विषयमा प्रतिबद्धता लिएको थियो ।
यसपटक ३० वैशाखमा स्थानीय तहको निर्वाचन हुँदैछ। तर, आचारसंहिता भने लागू भइसकेको छैन । उमेद्वार बन्न बहालवाला जनप्रतिनिधिले राजीनामा दिनुपर्ने छ।
