- २७ श्रावण २०८३, बुधबार / Aug 12, 2026
काठमाडौं । प्रधानमन्त्रीमा पुष्पकमल दाहाल प्रचण्ड नियुक्त भएलगतै आज पद तथा गोपनीयताको शपथ लिँदैछन् । शीतल निवासमा अपराह्न ४ बजे शपथ समारोहको आयोजना गरिदैछ ।
प्रचण्डको शपथसँगै सानो आकारको मन्त्रिपरिषद् गठन हुने बताइएको छ । पहिलो चरणमा सरकारमा जाने मन्त्रीहरूको नाम टुंगो लगाउन अहिले माओवादी केन्द्रको बैठक बसिरहेको छ । पहिलो चरणमा माओवादीबाट अमनलाल मोदी र सुदन किराँती मन्त्री बन्ने स्रोतको दावी छ ।
दुवै जना प्रदेश १ का हुन् । बागमतीका हितबहादुर तामाङ र सूर्यमान दोङमध्ये एक जना मन्त्री बन्ने सम्भावना छ । दाङबाट रेखा शर्मा मन्त्री बन्ने सूचीमा छन् ।
गण्डकीबाट हितराज पाण्डे, कर्णालीबाट महेन्द्रबहादुर शाही, शक्ति बस्नेको सम्भावना बलियो छ । जनार्दन शर्मा र वर्षमान पुन पनि शक्तिशाली मन्त्रालयका दाबेदार रहेको स्रोतले जानकारी दिएको छ ।
यसपटक प्रचण्डले वर्षमान पुनलाई सरकारमा लाने सम्भावना बढी रहेको छ भने वरिष्ठ उपाध्यक्ष नारायणकाजी श्रेष्ठ पनि मन्त्री बन्ने चर्चामा छन् ।
